ԱՍՊԱՐԷԶԱՅԻՆ ՓՈՐՁԱՌՈՒԹԵԱՆ ԱՄԱՌՆԱՅԻՆ ԾՐԱԳԻՐՆԵՐ

Հ.Բ.Ը.Մ.ի Ասպարէզային Փորձառութեան կամ Գործավարժութեան Ամառնային Ծրագիրները, որոնք լայն ժողովրդականութիւն կը վայելեն, առիթ կ’ընծայեն յառաջադէմ ուսանողներու, որպէազի անոնք իրենց ընտրած մասնագիտութիւններուն գծով գործնական փորձառութիւն շահին: Այս ծրագրին մասնակցութեամբ ուսանողներու շահած փորձառութիւնը եւ ստեղծած ծանօթութիւնները, անոնց ապագայ արհեստագիտական ասպարէզին մէջ կը դառնան յաջողութեան հիմք եւ յառաջդիմութեան գրաւական:

Գործավարժութեան այս ծրագիրը որ հիմնուած էր Նիւ Եորքի մէջ 1987ին, շուտով հանդիսացաւ հայ ուսանողներու նախընտրած ծրագիրներէն մին եւ ճիւղաւորուեցաւ դէպի Երեւան՝ 2007ին, եւ դէպի Մոսկուա՝ 2010ին: 2003էն սկսեալ, Հ.Բ.Ը.Մ.ը նոյնպիսի զուգահեռ ծրագիրներ կ՛իրագործէ նաեւ Ֆրանսայի մէջ (Փարիզ, Կրենոպլ, Լիոն եւ Վալանս), Հայաստանի Ֆրանսական Համալսարանին հետ գործակցաբար, ուսումնական տարուան ամբողջ տեւողութեան: 2014-ին, մեծ յաջողութեամբ սկսաւ նաեւ Լոնտոնի ասպարէզային փորձառութեան ծրագիրը:

Ընտրելով մրցունակ հայ ուսանողներ, ծրագիրը զանոնք կը տեղաւորէ գործարարական տարբեր ընկերութիւններու եւ հանրային-հասարակական կազմակերպութիւններու մէջ, ուր անոնք կ’աշխատին որպէս պաշտօնեաներ: Ծրագրին զուգահեռ Հ.Բ.Ը.Մ.ի տեղական կառոյցները կը կազմակերպեն նաեւ աշխատաժողովներ, մասնագիտական ցուցմունքներ եւ մշակութային ձեռնարկներ, որոնք կը հարստացնեն մասնակցողներուն գործագիտական հմտութիւնը եւ փորձառութիւնը:

Ցարդ Հ.Բ.Ը.Մ.ի Ասպարէզային Փորձառութեան Ամառնային Ծրագիրը օգտակար հանդիսացած է հարիւրաւոր սփիւռքահայ եւ հայրենի արհեստավարժներու, որոնք կրցած են յառաջ երթալ իրենց ասպարէզին մէջ եւ հասնիլ փայլուն յաջողութիւններու: Փոխադարձաբար՝ ծրագրէն «շրջանաւարտ» եղողներ իրենց ներդրումը կը բերեն համայնքներու կեանքին մէջ, դառնալով ասպարէզային փորձառութեան խորհրդատուներ եւ Հ.Բ.Ը.Մ.ի այլ ծրագիրներու աջակիցներ:

Հ.Բ.Ը.Մ.ի Ասպարէզային Փորձառութեան Ամառնային Ծրագիրներու մասին յաւելեալ տեղեկութիւններու համար այցելեցէք AGBU Summer Internship Program կայքէջը:

Տեսաերիզը կրնաք դիտել այստեղ

Back to

Share

x