March 04, 2022

Հ.Բ.Ը.Մ.ը Կը Շնորհաւորէ Վահագն Խաչատուրեանը Հայաստանի Հինգերորդ Նախագահի Պաշտօնին Իր Ընտրութեան Առիթով

Հայկական Բարեգործական Ընդհանուր Միութիւնը կը շնորհաւորէ Հայաստանի Նորընտիր Նախագահ Վահագն Խաչատուրեանը: Անոր ընտրութիւնը կը զուգադիպի պահու մը, երբ մեր ազգին դէմ  կը շարունակեն ծառանալ տարածաշրջանային եւ համաշխարհային բարդ մարտահրավէրներ, որոնց դիմագրաւումը կը պահանջէ ուժեղ առաջնորդութիւն եւ հաստատակամ յառաջընթաց: 

Հ.Բ.Ը.Մ.ը իր երախտագիտութիւնը կը յայտնէ Նախորդ Նախագահ Արմէն Սարգիսեանին, վճռորոշ ժամանակահատուածի ընթացքին ցուցաբերած իր ծառայութեան եւ առաջնորդութեան համար: Յատկապէս՝ Թաւշային Յեղափոխութենէն ետք, իշխանութեան սահուն անցումին սատարումով, նաեւ 44-օրեայ Արցախեան Պատերազմի ընթացքին ցուցաբերած խոհուն կեցուածքով եւ գործունէութեամբ: 

Հ.Բ.Ը.Մ.ը գործակցական խորունկ կապեր ունի ներկայիս Նախագահ Վահագն Խաչատուրեանի հետ, որուն հետ աշխատակցած է իր նախորդ պաշտօններուն մէջ, որպէս Երեւանի Քաղաքապետ եւ բարձր ճարտարագիտութիւններու մարզի նախարար: Առ այդ, պատրաստակամ է շարունակելու եւ առաւել եւս խորացնելու այդ գործակցութիւնը, երկրի զարգացման եւ ժողովուրդի կարիքներու բաւարարումին ուղղութեամբ: Այն հաստատ համոզումով, թէ Նախագահի, Ազգային Ժողովի եւ Վարչապետի պետական շրջանակներուն, Հայ Եկեղեցւոյ եւ աշխարհասփիւռ հայութեան սերտ գործակցութեամբ միայն կարելի է լաւագոյնս ծառայել մեր ազգի եւ ժողովուրդի շահերուն: