February 04, 2020

ԱՄՓՈՓՎԵՑԻՆ ԵՎՐԱՄԻՈՒԹՅԱՆ (ԵՄ ) ԿՈՂՄԻՑ ՖԻՆԱՆՍԱՎՈՐՎՈՂ ՀԱՅԿԱԿԱՆ ԲԱՐԵԳՈՐԾԱԿԱՆ ԸՆԴՀԱՆՈՒՐ ՄԻՈՒԹՅԱՆ (ՀԲԸՄ) «ՔՀ ԿԱՄՈՒՐՋ» ԾՐԱԳՐԻ ԱՐԴՅՈՒՆՔՆԵՐԸ

  • Image
    Panel discussion with partners and stakeholders. From left t
    Panel discussion with partners and stakeholders. From left t
    Caption
    Panel discussion with partners and stakeholders. From left to right: Talar Kazanjian (AGBU Armenia Executive Director) and Line Urban (EUD Armenia International Aid/Cooperation Officer).
  • Image
    Chargé d'Affaires a.i. of the EU delegation, Ekaterina Dorod
    Chargé d'Affaires a.i. of the EU delegation, Ekaterina Dorod
    Caption
    Chargé d'Affaires a.i. of the EU delegation, Ekaterina Dorodnova, gives opening remarks.

2019թ դեկտեմբերի 17-ին կայացավ Եվրամիության կողմից ֆինանսավորվող «ՔՀ Կամուրջ» ծրագրի պաշտոնական փակման միջոցառումը, որի ընթացքում ներկայացվեցին ծրագրի վերջնական արդյունքները, անցկացվեցին պանելային քննարկումներ գործընկեր կազմակերպությունների ներկայացուցիչների, աշխատակիցների և շահառուների մասնակցությամբ:

Ընդհանուր 2,255,286 եվրո արժողությամբ «ՔՀ Կամուրջ» դրամաշնորհային ծրագիրն իրականացվել է Հայկական բարեգործական ընդհանուր միության կողմից Եվրասիա համագործակցություն հիմնադրամի հետ համատեղ: Եռամյա այս ծրագրի նպատակն էր ամրապնդել հայաստանյան քաղաքացիական հասարակության կազմակերպությունների (ՔՀԿ-ներ) կարողությունները սփյուռքի ներուժի միջոցով՝ քաղաքացիների կարիքներին ավելի լավ արձագանքելու գործում: Շնորհիվ ՀԲԸՄ «ՔՀ Կամուրջ» ծրագրի, 49 հայաստանյան հասարակական կազմակերպություն ստացան դրամաշնորհ՝ ավելի քան 1,000,000 եվրո ընդհանուր ֆինանսավորմամբ՝ իրականացնելու նորարարության խրախուսմանն ու սոցիալական ձեռնարկատիրությունների զարգացմանն ուղղված ծրագրեր՝ սկսած համայնքային և տուրիզմի զարգացումից մինչև կանանց հզորացում, արվեստ և սոցիալական պաշտպանություն: Ծրագիրն առաջարկում էր նաև ՔՀԿ կարողությունների զարգացմանն ուղղված մի շարք փոխկապակցված բարեփոխումներ` վերապատրաստումներ, համալսարանական ոչ առևտրային կազմակերպությունների կառավարման դասընթաց, ՔՀԿ-ների անվճար խորհրդատվություն, ՔՀԿ-ների գործունեության բարելավման և իրազեկման նպատակով ընտրված բարի կամքի դեսպաններ:

Ծրագրի պաշտոնական փակման միջոցառմանը ներկա էին ԵՄ պատվիրակության ղեկավարի ժամանակավոր պաշտոնակատար Եկատերինա Դորոդնովան, ԵՄ միջազգային օգնության/համագործակցության պատասխանատու Լինե Ուրբանը, Եվրասիա համագործակցություն հիմնադրամի գլխավոր տնօրեն Գևորգ Տեր-Գաբրիելյանը, ՀԲԸՄ Հայաստանի ղեկավար կազմը, գործընկեր կազմակերպությունների ներկայացուցիչներ, շահառուներ և այլ հյուրեր:

ԵՄ պատվիրակության ղեկավարի ժամանակավոր պաշտոնակատար Եկատերինա Դորոդնովան իր ողջույնի խոսքում նշեց. «ԵՄ կողմից ֆինանսավորվող ՀԲԸՄ «ՔՀ կամուրջ» ծրագիրն ուներ բազմաթիվ նորարարական կողմեր: Սա իրոք նորարարական էր, քանի որ ԵՄ-ն առաջին անգամ համագործակցում էր ամենախոշոր համազգային և համահայկական կազմակերպության հետ: Ես իսկապես երախտապարտ եմ ՀԲԸՄ ղեկավարությանը ծրագիրն հաջող կերպով ավարտին հասցնելու համար: Բոլորս գիտենք, որ դյուրին չէ խոշոր ֆինանսական միջոցներ կառավարելը, իսկ այս ծրագրի դեպքում խոսքն 2,000,000 եվրոյի մասին էր: Դուք հիանալի աշխատանք կատարեցիք, որի արդյունքում 49 հասարակական կազմակերպություն Երևանից և մարզերից ենթադրամաշնորհ ստացան՝ գերազանցելով նախատեսված 30 կազմակերպությունների թիվը»:

Ներկաներին ողջունեց նաև ՀԲԸՄ կենտրոնական վարչության անդամ, ՀԲԸՄ Հայաստանի նախագահ Վազգեն Յակուբյանը: «Ուզում եմ շնորհակալություն հայտնել բոլոր այն մարդկանց և գործընկեր կազմակերպություններին, որոնց շնորհիվ այս ծրագիրն իրականություն դարձավ: Այս և այլ ծրագրերի միջոցով ՀԲԸՄ –ն սատարում է Հայաստանի սոցիալ-տնտեսական զարգացմանը, իսկ քաղաքացիական հասարակության կազմակերպությունների ներգրավումը կարևոր քայլ էր այս ոլորտն ավելի լավ հասկանու համար: Երախտապարտ ենք ծրագրի ընթացքում հաստատված գործընկերությունների համար և հույս ունենք, որ ստեղծվել է ամուր հիմք հետագա փոխգործակցության համար:»

Ողջույնի և շնորհավորանքի խոսքով հանդես եկավ նաև Եվրասիա համագործակցություն հիմնադրամի գլխավոր տնօրեն Գևորգ Տեր-Գաբրիելյանը: «Սա յուրօրինակ համագործակցություն էր, որի արդյունքում մենք ստեղծեցինք մի ծրագիր, որտեղ սփյուռքը առաջին անգամ այդ մասշտաբով և ինստիտուցիոնալ ուղիներով կարող էր ընդգրկվել Հայաստանի քաղաքացիական հասարակության զարգացման մեջ: Հայաստանում քաղաքացիական հասարակությունը և նրա կառույցները զարգանում էին կղզիացած ձևով: Մինչև հեղափոխությունը սփյուռքի շատ շրջաններում քաղաքացիական հասարակության կազմակերպությունների հետ աշխատելու վախ կար: Եվ մենք հասցեագրելով հենց այս խնդիրը՝ նպատակ դրեցինք ստեղծել կամուրջ Հայաստանի և սփյուռքի միջև, և կարծում եմ, որ հաջողեցինք:»

Հաջորդիվ ծրագրի ամփոփ ներկայացումը, պանելային քննարկումներն ու ծրագրի շահառուների հաջողված պատմություններն էին։

ՀԲԸՄ «ՔՀ կամուրջ» ծրագրի ենթադրամաշնորհառու, «Բալետ 2021» զարգացման հիմնադրամի գործադիր տնօրեն Լիլիթ Պետրոսյանը պանելային քննարկման ժամանակ խոսեց ՀԲԸՄ-ից ստացած ենթադրամաշնորհի օգտակարության մասին. «Շատ շնորհակալ ենք ՀԲԸՄ-ից մեզ զարգանալու և առաջ գնալու այս հնարավորությունը ընձեռելու համար: Մեր ծրագիրը նախատեսում է կատարողական միջազգային արվեստի ստեղծում Հայաստանում, տվյալ պարագայում՝ Գյումրիում: Ծրագիրը երկարաժամկետ ծրագիր է, որն ունի մեծ սոցիալական, տնտեսական և մշակութային բաղադրիչ: Որպես կազմակերպություն այս դրամաշնորհը մեզ տվեց լավ կապեր, ինչպես նաև հնարավորություն հրավիրելու ճարտարապետ նոր կենտրոնի կառուցման համար, իսկ որպես անհատ՝ գիտելիք և լավ ընկերներ:»

Պանելային այս քննարկմանն իրենց տպավորություններով և կատարած աշխատանքով կիսվեցին նաև ենթադրամաշնորհառու մյուս կազմակերպությունների ներկայացուցիչները՝ «Համայնքի զարկերակ» ԵՀԿ-ի նախագահ Արտուշ Խաչատրյանը, «Հավատ» վատ լսող երեխաների և մայրերի ՀԿ-ի անդամ Կարինե Հարությունյանը և այլոք:

Հաջողված պատմությունները շատ են, իսկ մենք՝ հպարտ, որ կարողացանք աջակցել հայաստանյան կազմակերպություններին իրականություն դարձնել իրենց ամենավառ գաղափարներն ու նախաձեռնությունները՝ ի նպաստ ավելի նորարարական, ամուր և կայուն քաղաքացիական հասարակության:

Please note that archived content may appear distorted as it has been stripped of formatting and original images.