ԿՐԹՈՒԹՅՈՒՆ

ՀԲԸՄ-ն ողջ աշխարհում աջակցում է բազմաթիվ կիրակնօրյա ու ցերեկային դպրոցների՝ առաջարկելով հայկական ուսումնական ծրագրեր և տեղական կրթական ծրագրի բարձր չափանիշներ: Ողջ աշխարհում և Հայաստանում ՀԲԸՄ-ն իրականացնում է բազմաթիվ արտադպրոցական ծրագրեր, այդ թվում՝ ՀԲԸՄ-ի երեք Հայորդյաց տները, «Արմատ» ծրագիրը, Շախմատի համադպրոցական մրցաշարը և Արցախի ԹՈՒՄՈxՀԲԸՄ կենտրոնը: Իսկ մեր վիրտուալ դասասենյակային միջոցառումներն ապահովում են, որ հայկական կրթությունը հասանելի լինի ամենքի համար:

Ավանդական և թվային միախառն հարթակների միջոցով առաջարկում ենք հայոց լեզվի, պատմության ու ժամանակակից արվեստի հարուստ ռեսուրսներ: ՀԲԸՄ-ի Նուբարյան գրադարանում պահպանվում է 19-20-րդ դարերի աղբյուրների ու աշխատությունների հսկայական արխիվ, որը գործածվում է կարևոր  տեղեկատվություն տարածելու համար: Նոր տեխնոլոգիաների, մեր հեղինակային էլեկտրոնային գրքերի ու հավելվածների, ՀՎՀ դասընթացների և WebTalk-երի կիրառմամբ ապահովում ենք նյութերի ծավալուն պահոցների հասանելիություն:

ՀԲԸՄ-ն միջազգային մակարդակով կրթաթոշակային լայն հնարավորություններ է առաջարկում սովորողներին: Մենք նաև անհատներին ու հաստատություններին տրամադրում ենք հետազոտական դրամաշնորհներ՝ հայագիտության տարբեր ասպարեզներում: Հայաստանում նշանակալի աջակցություն ենք ցուցաբերում համալսարաններին` Հայաստանի ամերիկյան համալսարանին, Երևանի պետական համալսարանին և Հայաստանում ֆրանսիական համալսարանին:

Երիտասարդներին տրամադրելով հնարավորություններ` բացահայտելու սեփական տաղանդներն ու հարթելու սեփական ուղին՝ ՀԲԸՄ-ն կրթում է ինքնավստահ և իրազեկ համայնքային առաջնորդների սերունդներ: Մեր սկաուտական, մենթորային և առաջնորդական ծրագրերում խթանվում են հայկական ոգին, հարատև հարաբերությունները, ոգեշնչվում սեփական համայնքներին և Հայ ազգին վարձահատույց լինելուն ուղղված գործողություններ: