ՄՇԱԿՈՅԹ

Մշակոյթի եւ արուեստներու խթանումը Հ.Բ.Ը.Մ.ի աւելի քան մէկ դարու գործունէութեան եւ ծրագիրներուն կորիզը կը կազմէ: Այդ մարզի նորագոյն ծրագիրն էր 2012-ին ստեղծուած Կատարողական Արուեստներու բաժինը որ առիթ կ’ընծայէ տարբեր տարիքի տաղանդաւոր անհատներու արուեստի մարզերու մէջ կատարելագործելու իրենց ձիրքերը եւ գիտութիւնը:

Հ.Բ.Ը.Մ.ի Կատարողական Արուեստներու բաժինը կը ձգտի ստեղծել արհեստավարժ հայ երաժիշտներու ցանց մը ու համակարգել անոնց գործունէութիւնը, օգտակար հանդիսանալով արուեստասէր շրջանակներու մօտ երաժիշտներու ծանօթացումին, ինչպէս նաեւ հայ երաժշտական ժառանգութեան պահպանումին: Երեւանի մէջ «Երաժշտական Հայաստան» տարեկան ծրագրի իրագործումին առընթեր, Կատարողական Արուեստներու բաժինը կը կազմակերպէ նաեւ յատուկ համերգներ, ուր հանրութեան կը ներկայանան Հ.Բ.Ը.Մ.ի կատարողական արուեստի կրթաթոշակակներու արժանացած տաղանդները: Հ.Բ.Ը.Մ. Սայաթ-Նովա Միջազգային Երաժշտական Մրցոյթը նոյնպէս, առիթ կու տայ երիտասարդ երաժշտահաններուն դրսեւորելու իրենց տաղանդը աւելի լայն շրջանակներու մէջ:

Հ.Բ.Ը.Մ.ի Կատարողական Արուեստներու Բաժնի մասին յաւելեալ տեղեկութիւններու համար գրել performingarts@agbu.org հասցէին:

Հ.Բ.Ը.Մ.ի հովանաւորութեամբ աւելի քան 25 երկիրներու մէջ կը գործեն բազմաթիւ Արուեստի եւ Երաժշտական Ակադեմիաներ, երգչախումբեր եւ պարախումբեր, որոնց անդամները կը մշակեն իրենց գեղարուեստական ձիրքերը եւ հաղորդ կը դառնան հայկական աւանդութիւններուն եւ պատմութեան: Այս խումբերը մեր համաշխարհային ընտանիքի կառոյցը ամրապնդող գործօններ են՝ որոնք սփիւռքահայ համայնքներու միջեւ նոր կապեր կը ստեղծեն եւ կը զօրացնեն ազգային գիտակցութիւնը:

Հ.Բ.Ը.Մ.ի մշակութային խումբերու մասին յաւելեալ տեղեկութիւններու համար գրել info@agbu.org հասցէին:

Հ.Բ.Ը.Մ.ի Մշակութային Ծրագիրներու մասին տեսաերիզը դիտելու համար ընտրեցէք ներքեւի հասցեն:

Հ.Բ.Ը.Մ.ի Մշակութային Ծրագրեր

 

ԱՐՈՒԵՍՏԻ ԵԻ ԵՐԱԺՇՏՈՒԹԵԱՆ ԱԿԱԴԵՄԻԱՆԵՐ

Հ.Բ.Ը.Մ.-ը արուեստներու զարգացման իր յանձնառութեան ծիրէն ներս կը հովանաւորէ, սփիւռքահայ ակադեմիաներ՝ Արամ Խաչատուրեան Երաժշտական Դպրոցը եւ Սարեան Ակադեմիան, երկուքն ալ Հալէպի մէջ: Այս հաստատութիւններէն կ’օգտուին մեծ թիւով պատանիներ եւ երիտասարդներ: Հայ դասական երաժշտութեան եւ գեղարուեստներու պահպանումին եւ ուսուցման գիծով անոնք զգալի ներդրում կը կատարեն, շարունակելով ականաւոր երաժշտահան Արամ Խաչատուրեանի եւ հռչակաւոր արուեստագէտ գեղանկարիչ Մարտիրոս Սարեանի աւանդը: Իրենց ոգեշնչող համերգներով եւ ցուցահանդէսներով, այս երկու հաստատութիւնները շրջանի հայ երիտասարդութեան եւ համայնքին համար մշակոյթի օճախներ դարձած են:

Արամ Խաչատուրեան երաժշտական դպրոցը հիմնուած է 2009ին, իսկ Սարեան Ակադեմիան՝ 1955ին:

ԵՐԳՉԱԽՈՒՄԲԵՐ

Դասական եւ ժամանակակից հայկական երաժշտութեան մշակումի եւ ժողովրդականացումի առաքելութեան լծուած Հ.Բ.Ը.Մ.ի երգչախումբերը եւ անոնց վաստակաւոր խմբավարները, իրենց փայլուն ելոյթներով կը հրապուրեն ու կը խանդավառեն իրենց հանդիսատեսները: Հ.Բ.Ը.Մ.ը աշխարհի տարածքին կը հովանաւորէ զանազան երաժշտական խումբեր, ինչպէս՝

Կոմիտաս Երգչախումբ Հասքովօ, Պուլկարիա
Առաւօտ Երգչախումբ Եամպոլ, Պուլկարիա
Պատանեկան Երգչախումբ Թորոնթօ, Գանատա
Ծիածան Մանկական Երգչախումբ Գահիրէ, Եգիպտոս
Գողթան Երգչախումբ Փարիզ, Ֆրանսա
Հ.Ե.Ը.ի Երգչախումբ Պաղտատ, Իրաք
Սպենդիարեան Երգչախումբ Հալէպ, Սուրիա
Կռունկ Երգչախումբ Մոնթէվիտէօ, Ուրուկուէ

ՊԱՐԱԽՈՒՄԲԵՐ

Հ.Բ.Ը.Մ.ի պարախումբերը իրենց ոգեշնչող համոյթներով եւ հայ մշակութային հարուստ աւանդներու ցուցադրութեամբ շահած են արժանի համբաւ եւ համակրանք: Իրենց խնամքով եւ բծախնդրութեամբ պատրաստուած եւ հմտօրէն ցուցադրուած պարարուեստով, ինչպէս նաեւ աւանդական ազգային տարազներով, Հ.Բ.Ը.Մ.ի համոյթները ոգեւորած են հոծ բազմութիւններ յայտնի հանդիսասրահներու մէջ, ինչպէս Նիւ Եորքի կատարողական արուեստներու Լինքըն Սենթըրը եւ Երեւանի Պետական Օփերայի թատրոնը: Հ.Բ.Ը.Մ.ի պարախումբերուն շարքին մաս կը կազմեն`

Արարատ Պարախումբ (Գորտոպա, Արժանթին)
Կարօտ Պարախումբ (Վիէննա, Աւստրիա)
Հ.Բ.Ը.Մ. Պարախումբ (Տոպրիչ, Պուլկարիա)
Նուռ Պարախումբ (Սոֆիա, Պուլկարիա)
Հ.Ե.Ը.-ի Արին Պարախումբ (Պէյրութ, Լիբանան)
Հ.Ե.Ը.-ի Անդրանիկ Պարախումբ (Հալէպ, Սուրիա)
Հ.Ե.Ը.-ի Փունջ Մանկապատանեկան Պարախումբ (Հալէպ, Սուրիա)
Անդրանիկ Պարախումբ (Նիւ Եորք, ԱՄՆ)

ԵՐԱԺՇՏԱԿԱՆ ԽՈՒՄԲԵՐ

Հ.Բ.Ը.Մ.ի երաժշտական խումբերը այսօրուան երաժշտասէրներուն հասանելի կը դարձնեն հայկական երաժշտական գործիքներու եւ երգերու իւրայատուկ հնչիւնները, որոնք դարաւոր պատմութիւն ունին: Անոնց յայտագիրները կը ներառեն աւանդական ազգագրականէն մինչեւ դասական ու ժամանակակից նմոյշներ:

Հ.Բ.Ը.Մ.ի երաժշտական խումբերէն են՝

Ծիրանի Երիտասարդական Նուագախումբ (Գորտոպա, Արժանթին)
Էրեբունի Նուագախումբ (Փլովտիւ, Պուլկարիա)
Սենեկային Նուագախումբ (Սոֆիա, Պուլկարիա)
Սենեկային Նուագախումբ (Ստեփանակերտ, Ղարաբաղ)
Հ.Ե.Ը.ի Պիկ Պէնտ Նուագախումբ (Հալէպ, Սուրիա)
Հ.Ե.Ը.ի Փողերախումբ (Հալէպ, Սուրիա)
Կոմիտաս Սենեկային Նուագախումբ (Հալէպ, Սուրիա)

ԹԱՏԵՐԱԽՈՒՄԲԵՐ

Հ.Բ.Ը.Մ.ի թատերախումբերու բարձրորակ ներկայացումները բազմաթիւ քաղաքներու մէջ հայ համայնքներուն համար արուեստի չափանիշ դարձած են: Գնահատելով հայ վաստակաւոր դերասաններն ու բեմադրիչները, վերաբեմադրելով հայ դասական թատերագիրները եւ բեմ բարձրացնելով ժամանակակից թատրերգութիւններ ու երաժշտաթատերական գործեր, մեր խումբերը թատրոնի ոգին բարձ կը պահեն հայկական համայնքներուն մէջ: Թատերասէր հանրութիւնը ծանօթ է Հ.Բ.Ը.Մ.ի թատերական հետեւեալ խումբերու գործունէութեան.

Գրիգոր Սաթամեան Թատերախումբ, (Պուէնոս Այրէս, Արժանթին)
Յակոբ Պարոնեան Թատերախումբ (Մելպուռն, Աւստրալիա)
Վահրամ Փափազեան Թատերախումբ (Սիտնի, Աւստրալիա)
Երիտասարդաց Թատերախումբ (Հասքովօ, Պուլկարիա)
Ահազանգ Թատերախումբ (Փարիզ, Ֆրանսա)
Վահրամ Փափազեան Թատերախումբ (Պէյրութ, Լիբանան)
Պետրոս Ադամեան Թատերախումբ (Հալէպ, Սուրիա)

Հ.Ե.Ը.-ի Սաթամեան (նախապէս Վահրամ Փափազեան) Թատերախումբ, Փասատենա, Գալիֆորնիա, ԱՄՆ

Back to

Share

x