Հ.Բ.Ը.Միութիւնը Հայաստանի մէջ

 

 

Ժամանակագրութիւն

Իր հիմնադրութենէն ի վեր, Հ.Բ.Ը.Միութեան մտասեւեռումը եղած է օժանդակել հայրենի ժողովուրդին եւ օգնել՝ որպէսզի մեր հայրենիքը, որպէս ստեղծագործ եւ բարգաւաճ երկիր, առիթը ունենայ դրսեւորելու իր ներուժը եւ կարողութիւնները: Մեկնելով գլխաւորաբար ազգային գերագոյն շահերէ, Հ.Բ.Ը.Միութիւնը նուիրումով ծառայած է Հայաստանին, անկախ հոն տիրող ներքին քաղաքական իրավակարգերէն:

Հ.Բ.Ը.Մ.-ի առաջին օգնութիւնը Հայաստանին

1907ին, իր հիմնադրութենէն անմիջապէս ետք, Հ.Բ.Ը.Մ.-ը սերմնացու եւ սննդեղէն հասցուց Երեւան, օգնելու համար սովի սպառնալիքին մատնուած բնակչութեան:

Հ.Բ.Ը.Միութիւնը Խորհրդային Հայաստանի մէջ

1920-30ակններ.- Խորհրդային Հայաստանի Կրթութեան եւ Գիւղատնտեսութեան պաշտօնատարներ Ասքանազ Մռավեանի եւ Արամայիս Երզնկեանի կողմէ ստորագրուած որոշումով, Հ.Բ.Ը.Միութիւնը դարձաւ միակ բարեսիրական կազմակերպութիւնը որուն արտօնուեցաւ գործել Խորհրդային Հայաստանի մէջ: Հետագայ 14 տարիներուն Հ.Բ.Ը.Միութիւնը դրամական միջոցներ տրամադրեց հոգալու համար ենթակառոյցներու եւ քաղաքաշինութեան, ինչպէս նաեւ կրթութեան եւ որբերու տեղափոխութեան ծախսերը:

1920-ականներուն գիւղատնտեսական մեքենաներ, սերմնացու եւ այլ օժանդակութիւններ առաքուեցան Խորհրդային Հայաստան:

1923-36.- Հ.Բ.Ը. Միութեան հոգածութեամբ ցեղասպանութենէն վերապրած շուրջ 17,000 հայ գաղթականներ Յունաստանէն, Թուրքիայէն, Լիբանանէն, Պաղեստինէն, Ֆրանսայէն, Պուլկարիայէն եւ այլ երկիրներէ տեղափոխուեցան Հայաստան:

1924.- Հ.Բ.Ը.Մ.-ի որբանոցներու 250 որբերու տեղափոխում Հայաստան:

1925.- Նոր Եւդոկիա գիւղի հիմնում` գաղթականներ վերաբնակեցնելու համար:

1926.- Օգնութիւն Շիրակի երկրաշարժէն վնասուած շրջանի վերականգման աշխատանքներուն:

1929.- Հանրային առողջապահութեան զարգացման եւ կեանքի մակարդակի բարելաւման նպատակով Մարի Նուպար ակնաբուժարանի եւ Դարուհի Յակոբեան Մայրանոցի հիմնում:

1930էն սկսեալ.- Մելգոնեան Հիմնադրամի միջոցներով օժանդակութիւն Երեւանի Պետական Համալսարանին՝ կարեւոր գիտական աշխատութիւններ հրատարակելու, ինչպէս նաեւ նորագոյն սարքաւորումներ ձեռք բերելու համար:

1936.- Երեւանի մէջ Հայ մտաւորականներու բնակարանային շէնքի կառուցում:

1937.- 1 միլիոն ամերիկեան տոլարի հանգանակութիւն եւ Նուպարաշէն աւանի կառուցում, ուր բնակութիւն հաստատեցին 1000 հայրենադարձ գաղթականներ:

1937.- Հ.Բ.Ը.Մ.-ի կառուցած Մատենադարանի եւ տպարանի բացում:

1944 .- 105,000 ամերիկեան տոլար արժող դեղերու եւ հագուստեղէնի ուղարկում Հայաստան:

1946.- Պարսկաստանէն, Լիբանանէն, Սուրիայէն, Պուլկարիայէն, Յունաստանէն եւ Ռումանիայէն 51,060 հայերու տեղափոխութիւն Հայաստան, շնորհիւ Հ.Բ.Ը.Մ.-ի կողմէ հանգանակուած 1,073,810 ամերիկեան տոլար գումարի:

1944-48.- Յետպատերազմեան Հայաստանին օգնելու եւ ներգաղթին օժանդակելու նպատակով Հ.Բ.Ը.Մ.-ի նախաձեռնութեամբ հանգանակում աւելի քան 2 միլիոն ամերիկեան տոլարի:

1950-88.- Մայր Աթոռ Ս. Էջմիածնի միջոցով օժանդակութիւններ Հայաստանին:

1983.- Ալեք Մանուկեան գանձատան բացում Մայր Աթոռ Սուրբ Էջմիածնի մէջ:

1988ի երկրաշարժ

Գիւմրիի եւ Սպիտակի աղիտալի երկրաշարժէն անմիջապէս ետք, Հ.Բ.Ը.Միութիւնը ճիգեր գործադրեց արտակարգ օգնութիւն հասցնելու ուղղութեամբ, փրկելով հազարաւոր կեանքեր: Բնական աղէտին յաջորդած երեք օրերու ընթացքին, Հ.Բ.Ը.Մ.ը դեղ, հագուստ, սննդեղէն եւ այլ անհրաժեշտ իրեր առաքեց Հայաստան: Միութիւնը անմիջապէս լծուեցաւ նաեւ աղիտեալներու բուժումի աշխատանքներուն, Միացեալ Նահանգներու մէջ կազմակերպելով անոնց ապաքինումը կամ արտասահմանէն բժիշկներ եւ մասնագէտներ ուղարկելով Հայաստան: 1991ի աւարտին, Միութիւնը 10 միլիոն ամերիկեան տոլար հանգանակեց որպէս օգնութիւն երկրաշարժի զոհերուն:

Հայաստանի Անկախութիւն (1991էն մինչեւ այսօր)

Հայաստանի Հանրապետութեան անկախութեան հռչակումով, երբ երկիրը տակաւին կազմաւորումի ընթացքի մէջ կը գտնուէր, Հ.Բ.Ը.Մ.ը ընդլայնեց իր մարդասիրական օգնութեան ծրագիրները, կառուցելով ազգային-մշակութային եւ կրթական հաստատութիւններ, որոնք նոր կարելիութիւններ պիտի ստեղծէին երիտասարդութեան համար եւ նպաստէին հայրենի տաղանդներու յայտնաբերման ու երիտասարդ առաջնորդներու կազմաւորումին: Այս մարզէն ներս գործադրուեցան կրթական, առողջապահական, ընկերային ծառայութեան եւ հոգեւոր կրթութեան ծրագիրներ: Անորոշութիւններու ժամանակաշրջանին, երբ կառավարութիւնը նոր կը կազմուէր, այս կառոյցները յոյսի եւ ոգեւորութեան կռուաններ հանդիսացան եւ ցարդ կը շարունակեն իրենց օգտաշատ գործունէութիւնը:

Կրթական

  • Ստեփանակերտի թիւ 7 դպրոցի ամբողջական նորոգութիւն: Բացումը տեղի ունեցաւ 16 Յունուար 2006ին: Հարիւրաւոր աշակերտներ յաճախած են այս դպրոցը
  • Գիւմրիի թիւ 7 դպրոցի ամբողջական վերակառուցում եւ վերականգնում: 
  • Գիւմրիի Լորտ Պայրընի անուան դպրոցի վերանորոգութիւն, շարունակական հոգածութիւն, կաթսայատան եւ խաղադաշտի կառուցում
  • Հաշմանդամ երախաներու Գիւմրիի թիւ 3 դպրոցի նորոգութիւն եւ շարունակուող հոգածութիւն 
  •  Իրինդ գիւղի դպրոցի ամբողջական կահաւորում 
  • Մեծագումար ներդրում եւ օժանդակութիւն Հայաստանի Ամերիկեան Համալսարանին
  • Մայր Աթոռ Ս. Էջմիածնի եւ Հ.Բ.Ը.Մ.-ի Երեւանի Նորք, Արաբկիր եւ Մալաթիա արուարձաններու Հայորդեայց Տուներու հիմնում եւ շարունակական օժանդակութիւն: Հայորդեայց Տուները արտադպրոցական յայտագիրներ կը գործադրեն կատարողական արուեստներու, մարմնամարզութեան, կրկեսային խաղերու, հոգեւոր կրթութեան, համակարգչային գիտելիքներու եւ արուեստի բնագաւառներուն մէջ 
  •  Օժանդակութիւն Հայաստանի Ֆրանսական Համալսարանին 
  •  Օժանդակութիւն Բենիամին Ժամկոչեան վարժարանին, մարզասրահի, կրօնի եւ համակարգչային դասընթացներու համար համապատասխան դասարաններու պատրաստութիւն եւ կահաւորում

 

Մշակոյթ

Գիւմրիի Արուեստներու Ակադեմիա: 1997ին, Հ.Բ.Ը.Մ.ը վերանորոգեց հին շէնքը, որ ամբողջովին քանդուած էր երկրաշարժի ընթացքին եւ հոն հիմնեց Գիւմրիի Արուեստներու Ակադեմիան, ուր կը գործեն Երեւանի Գեղարուեստի Ակադեմիայի, Շարժանկարի եւ Թատրոնի Ինստիտուտի եւ Կոմիտասի անուան Երաժշտանոցի Գիւմրիի մասնաճիւղերը:1997էն ի վեր յաճախողներու թիւը ինն ուսանողներէ հասած է 150ի: 2005ին, Հ.Բ.Ը.Միութիւնը շէնքի տանիքի վրայ կառուցեց գեղանկարիչ ուսանողներու համար նոր արուեստանոցներ:

Եկեղեցաշինութիւն եւ Հոգեւոր կրթութիւն

Հ.Բ.Ը.Մ.-ի բարերարներու տրամադրած միջոցներով կառուցուած են բազմաթիւ եկեղեցիներ եւ հոգեւոր կրթութեան հաստատութիւններ, Մայր Աթոռ Ս. Էջմիածնի հետ համագործակցաբար: Ամբողջական ցուցակը կարելի է տեսնել այստեղ

  • Մայր Աթոռ Ս. Էջմիածնի Ալեք եւ Մարի Մանուկեան Գանձատուն, 1983
  • Ս. Գրիգոր Լուսաւորիչ Մայր Եկեղեցի
  • Երեւանի Սուրբ Երրորդութիւն Եկեղեցի
  • Գիւմրիի Սուրբ Յակոբ Եկեղեցի
  • Վանաձորի Սուրբ Գրիգոր Նարեկացի Եկեղեցի
  • Նոր Նորքի Սուրբ Սարգիս Եկեղեցի
  • Երեւանի Արաբկիրի Եկեղեցի
  • Մայր Աթոռի Միաբանական շէնք
  • Սեւանի Վազգէնեան Ընծայարան
  • Մայր Աթոռ Ս. Էջմիածնի Բացօդեայ Խորան
  • Մայր Աթոռ Ս. Էջմիածնի Դիւանատուն
  • Հին Վեհարանի վերանորոգում
  • Գարեգին Բ. Կրթական Կեդրոն
  • Մոմավառութեան Սրահ եւ Կաթողիկոսական դամբարան (հիմնարկէք, 2012)

 

Ընկերային – Առողջապահական

Հայաստանի հանրային առողջութեան եւ բժշկութեան բնագաւառներուն մէջ Հ.Բ.Ը. Միութիւնը կարեւոր ներդրումներու միջոցով բժշկական սարքաւորումներ տրամադրեց, մասնագէտներու համար վերապատրաստութեան դասընթացներ կազմակերպեց, ինչպէս նաեւ արդիական սարքաւորումներով օժտոած ախտորոշումի կեդրոններ կառուցեց: Մայր Աթոռ Ս. Էջմիածնի հետ միասին, Հ.Բ.Ը.Մ.ը դրամական միջոցներ տրամադրած է վերակառուցելու եւ ընդլայնելու հիւանդանոցներ եւ դարմանատուներ: Միութիւնը նիւթապէս օժանդակած է Մայր Աթոռ Ս. Էջմիածնին, վերանորոգելով եւ ընդլայնելով հիւանդանոցներ եւ ընկերային ծառայութեանց կեդրոններ, որոնցմէ յատկանշական են նախկին «Պիոներական պալատ»ներու փոխակերպումը Հայորդեայց տուներու, ուր յատուկ ուսուցիչներ եւ արուեստագէտներ պարման-պարմանուհիներու համար արտադպրոցական յատուկ դասընթացներ կը վարեն ստեղծագործական աշխատանքներու եւ կատարողական արուեստներու գծով:

Զանազան այլ ծրագիրները կ’ընդգրկեն`

  • Վանաձորի, Թալինի եւ Եղուարդի Յղի Կանանց Կեդրոններու հիմնում եւ ծառայութիւններ
  •  Տարեցներու ճաշասրահներ Երեւանի Նորքի, Մալաթիայի եւ Արաբկիրի, ինչպէս նաեւ Վանաձորի եւ Էջմիածնի Հայորդեայց Կեդրոններուն մէջ
  •  Հ.Բ.Ը.Մ.-ի Ճառագայթային ախտորոշումի կեդրոն
  •  Վանաձորի մանկատան նորոգութիւն  Վանաձորի թիւ 4 դարմանատան նորոգութիւն
  •  Ամասիայի շրջանի կարիքաւոր ընտանիքներուն կովերու եւ ալիւրի տրամադրում
  •  Ս. Ներսէս հիւանդանոցի կառուցում

 

Վերջին տարիներուն, Հ.Բ.Ը. Միութիւնը Արցախի մէջ նոյնպէս կարեւոր ներդրումներ ըրած է դպրոցներու եւ բնակարաններու կառուցման կենսական ծրագիրներու գործադրութեան համար: Միութիւնը կը շարունակէ օժանդակել Արցախի Սենեկային նուագախումբին, ինչպէս նաեւ կը նպաստէ կրթական ծրագիրներու գործադրութեան:

Միութեան Հայաստանի ծրագիրներուն մասին յաւելեալ տեղեկութիւններ ստանալու համար այցելեցէք Հ.Բ.Ը.Մ. Հայաստանի կայքը:

 

More

x